تجربتي لدورة تنظيف القولون. 🌻

مرحبا اصدقائي….♥️

تدوينة اليوم زي ما وعدتكم بتكون لتجربتي لدورة الدكتوره ندى وتأثيرها على بشرتي وجسمي بشكل عام..🌿

✨في البداية ايش هي دورة تنظيف القولون وايش أهميتها؟
الدوره عباره عن كورس غذائي لتنظيف الجسم بشكل عام والقولون والكبد بشكل خاص من السموم، أقل مده له اسبوع وأكثر مده شهر.

✨كيف طريقة الدوره؟
بالمختصر ترجعي للطبيعه في نظام اكلك.. يعني كل منتج حيواني أو مصنع أو معلب ممنوع.

📍تفاصيل الدوره:

✨الممنوعات:
كل المنتجات الحيوانيه حتى البيض والحليب “عدا الزبادي”.
السكريات.
المقليات.
المعلبات.
الكافيين “حتى الشاهي الأخضر”.
الشيبسات.
الرز والمكرونه والخبز الابيض.
البيبسي والغازيات بشكل عام.
أي منتج يحتوي على مواد حافظه.

✨المسموحات:
الخضروات والفواكه بجميع أنواعها “عدا المعلبه”.
الحبوب الكامله “زي الشوفان”.
الرز والمكرونه والخبز الأسمر.
شاهي الأعشاب “بدون كافيين”.
الزبادي.
المكسرات “غير مملحه”.
الحبوب والبقوليات.
زيت الزيتون وجوز الهند.

✨تجربتي بالتفصيل:
بالنسبه لي سويت الدوره ٤ مرات متفرقه وكل مره كانت لمدة اسبوع.. بصراحه النظام على قد ما استفدت منه إلا انه كان صعب جداً بالنسبه لي “لأني مدمنة قهوه وشاهي” حسيت بعد النظام خف الإدمان كثير.
أول تجربه كانت اصعب تجربه لدرجة كل يوم اصحى اقرر اوقفه بس ماما كانت تحفزني اكمل “أخر يوم كان يوم عيد بالنسبه لي”..

✨ملاحظاتي قبل تجربة الدوره:
في البدايه انا سويته لسببين..اول سبب لأني اعاني من تهيجات القولون مستمره وجداً مزعجه لدرجة تستمر لأيام، السبب الثاني لأني احس جسمي مليان سموم خصوصاً هذيك الفتره ما ابالغ لو اقول كنت اعتمد على الشيبسات بدل وجبة العشا، والاندومي كانت من اهم من المويه عندي.. ما انسى الكابتشينو والشوكولاتات والغازيات مع انعدام الفواكه والخضروات والسلطات والمويه..عادي يمر اسبوع ما اشرب مويه.
وهذا كله انعكس على صحتي وبشرتي ونومي…
بشرتي شاحبه ومليانه تصبغات، احس جسمي مرهق مهما انام احس باجهاد وتعب وصداع وما انسى الخمول… وبسبب الكسل صار عندي سلوليت.

✨خلال فترة الدوره:
🔺زاد الاجهاد والارهاق عندي “نتيجه طبيعيه لانسحاب السموم من الجسم”.
🔺القولون عندي صار يتنظف باستمرار “خلال هالفتره زاد الغازات وهذا شي طبيعي”.
🔺اول يومين زاد الارق “اتوقع بسبب الكافيين” بعدين بدأ يتنظم نومي.
🔺زاد شربي للمويه “لأني تعودت طول اليوم اشرب شاهي أو قهوه اضطريت استبدلها بمويه أو شاهي اعشاب”.
🔺نفسيتي صارت اسوأ وعصبيه اكثر.

✨ملاحظاتي بعد ما خلصت الدوره:
🔸بشرتي صارت صافيه ومتوحده.
🔸خفت دهون بشرة وجهي.
🔸بشرة جسمي صارت مرتويه “كانت شديدة الجفاف”
🔸تقريباً اختفت الهالات بنسبة ٩٠٪.
🔸رجع لي نشاطي وتنظم نومي بشكل كبير.
🔸تهيجات القولون خفت كثير “عدا من بعض الاكلات”.
🔸احس نفسي هاديه ورايقه اكثر.
🔸خف السلوليت كثير “لاحظت نتيجه افضل مع التمرين”.
🔸الحرقان والتخمه والشعور المزعج اللي احس في في رأس المعده اختفى.

📍النتيجه لاحظتها بعد كل مره اسوي فيها الدوره بس كل مره اشوف نتيجه افضل من اللي قبل.
📍الدوره سويتها كل سنه مره او مرتين “على حسب حاجتي”.
📍اللي عندهم امراض مزمنه ضروري تستشيرون دكتوركم.
📍النظام ما تسوينه اكثر من شهر وضروري توقفينه لأن اغلب العناصر الغذائيه اللي يحتاجها الجسم مو موجوده فيه.
📍العسل مادري نباتي او حيواني بس احتياط استبعدته.
📍في حال اشتهيت سكر كنت اكتفي بالتمر.
📍الأفضل تسويه مع تمارين رياضيه عشان الجسم يتخلص من السموم اسرع بس انا ما قدرت.
📍ممكن تحسي بصداع شديد خلال فترة الدوره هذا شي طبيعي.
📍على الريق سوي مضمضة زيت الزيتون مهمه جداً للتخلص من السموم.
📍ضروري هالفتره تشربي عصيرات طبيعيه “افضل العصيرات الموجوده في حساب الدكتوره ندى”.

هذي تجربتي الشخصية بالتفصيل مع الدوره والحمدلله مره استفد منها وعندي استعداد اكرر التجربه اذا احتجت لها.
اذا حابين تفاصيل وتجارب اكثر تحصلونها في حساب الدكتوره ندى.