أفضل مرطبات الشفايف من تجربتي..💄

مرحبا أصدقائي…🌻

.

🌿إِنَّمَا أَمْرُهُ إِذَا أَرَادَ شَيْئًا أَنْ يَقُولَ لَهُ كُنْ فَيَكُونُ

.

بما ان الصيف على اخره “ولله الحمد” يعني داخلين على الشتا والجفاف ونحتاج ترطيب مكثف سواء بشره او جسم او شفايف.

تدوينة اليوم عن أفضل مرطبات الشفايف اللي جربتها سواء يومي او قبل النوم… بتكلم عن كل مرطب بالتفصيل وايجابيات وسلبيات كل مرطب…

✨المرطب الأول مرهم بيبانثين:

المرهم لمعالجة التحسس الناتج عن الحفاظات للأطفال لكن بما انه مرهم ثقيل ينفع برضو للمناطق الجافه مثل الشفايف والاكواع وكعب القدم وغيره.

المرهم معالج من الدرجه الاولى لجفاف وتشققات الشفايف، برضو يعالج التصبغات اللي مسببها الجفاف “مع الاستمرار”..لأصحاب الشفايف شديدة الجفاف ينفع تحطي مسحه بسيطه جداً قبل الروج يعطيك منظر صحي ومرتب للروج.

طريقتي: احط طبقه كثيفه قبل النوم على كامل الشفايف والاطراف والصباح امسحها بمنديل مع تدليك بسيط عشان اشيل الجلد الميت.. بكذا استمتع بشفايف ناعمه وصحيه.

من سلبيات المرهم: اذ كانت الكميه كثيفه على شفايفك لما تشيليه يصير لونها ابيض “مو وردي”.

لما تمسحيه حاولي تكون يدك خفيفه لأن الشفايف وقتها تصير رقيقه ممكن تجرحي نفسك.

🍓🍓🍓🍓🍓🍓🍓🍓🍓

✨المرطب الثاني مرطب نيتروجينا:

المرطب يوعدك بترطيب مكثف وحمايه لمدة ٦ ساعات..

قوام المرطب ثقيل شوي بس اخف من بيبانثين.. برضو ما يعطيك شعور لزج او كأنه في شي ثقيل على شفايفك.

بالنسبه لي من أفضل المرطبات “في الشتا”.. لأنه يرطب من قلب ويترك شفايفك ورديه ناعمه وينفع تستعمليه طوال اليوم.

من سلبيات المرطب: اذا ما كانت شفايفك شديدة الجفاف لا تفكري تستعمليه لأنه ما ينفع تستعمليه على طول.. من خلال استمراري عليه في الفتره اللي تكون شفايفي مترطبه واستعمله تصير جداً رقيقه حتى لو شلته بخفيف احس بجروح واوقات تنزف.. عشان كذا الأفضل تستعمليه للشفايف “شديدة” الجفاف.

📍مكان الشراء: هايبر بنده.

💵سعره: بين 15-17 ريال.

🍓🍓🍓🍓🍓🍓🍓🍓🍓

✨المرطب الثالث مرطب باريديرم سيكا من يورياج:

هذا من أفضل المرطبات بالنسبه لي في كل الأحوال حتى في الشتا.

المرطب مخصص لحماية الشفايف من الجفاف ويعطيك منظر ناعم وصحي وخالي من العطور..

قوامه اخف من المرطبات اللي قبل “يصنف على انه بلسم”.. وينفع تستعمليه قبل النوم وبقية اليوم وقبل الروج.. مناسب ولطيف في كل الحالات.. حتى لما تشيليه ما يجرح شفايفك أو تحسيها رقيقه بزياده.

من سلبيات المرطب سعره مرتفع شوي “بالنسبه لصيدلياتنا” ممكن تحصلوه في ايهيرب بسعر مناسب اكثر.

📍مكان الشراء: صيدلية النهدي.

💵سعره: ٧٢.٤٥ ريال.

🍓🍓🍓🍓🍓🍓🍓🍓🍓

✨المرطب الأخير والمفضل بيبي من ميبيلين بنكهة الكرز:

المرطب يحتوي على زبدة الشيا وفيتامين هـ.. ويوعدك بترطيب يصل الى ٨ ساعات.

بالنسبه لي اعتبره ترطيب يومي يعني كل كم ساعه أو بعد الوضوء أو بعد الأكل احط منه.

لونه لطيف ونكهته خفيفه وغير مزعجه أو تحسي بطعم عطر.

ممكن يعطيك شفايف رطبه لكم ساعه “بدون أكل أو شرب”.

غالباً اعتمده قبل الروج أو التنت لأنه أحس يعطي ترطيب وطبقة حمايه.

ما أعتمده قبل النوم لأنه ما يعتبر ترطيبه ثقيل.

استعمله من كم سنه ما اشوف فيه سلبيات إلا “الألوان الثانيه مزعجه”.

📍مكان الشراء: ايهيرب.

💵سعره: 19.95 ريال.

🍓🍓🍓🍓🍓🍓🍓🍓🍓

هذي تجربتي بالتفصيل لأفضل مرطبات الشفايف “بالنسبة لي”.♥️

ايش المرطب اليومي المفضل لكم؟..