عنايتي لشعري

مرحبا اصدقائي …🌻♥️

مدونة اليوم ابتكلم فيها عن عنايتي بشعري وايش الي ناسب شعري بالتفصيل.
ف البدايه شعري طبيعته الفروه نوعاً ما دهنيه والاطراف جافه “تالفه” وخفيف من مقدمة الشعر عشان كذا قررت اقصه لحد كتفي تقريباً.. بعد فتره وبسبب الرطوبه رجع لي التلف والجفاف ومن هنا بدأت رحلة التجارب…
اول تجربه لي كانت مع حنا المعجزه للدكتوره هند مع طريقة رحاب الغامدي في بودرة الحنا وكانت النتيجه ممتازه بعد فتره مليت من الحنا لأنه مرهق وصرت اصدع لما احط منه قررت اغير عنايتي واعتمد على الزيت والتونك .
الفتره الاخيره اعتمدت التونك مع زيت سحايب ومساج يومي تقريباً.

.

✨✨✨✨✨✨✨✨✨✨

طريقة التونك: ملعقة محلب مجروش وملعقة روز ماري “اكليل الجبل” مجفف و 5 نقط زيت اللافندر المركز.. مع كوب مويه مغليه وخليتها يوم كامل بعدين صفيتها وحطيتها ف بخاخ.
التونك استعمله قبل الزيت واوقات بعد الحمام.
وارشه على شعري كامل من الجذور للاطراف مع مساج للفروه.

.

✨✨✨✨✨✨✨✨✨✨

طريقتي في استعمال الزيت يومين الى ثلاث ايام ف الاسبوع اتركه من ساعتين الى ثلاث ساعات والبس الشاور كاب لحد م ينتهي الوقت.

✨✨✨✨✨✨✨✨✨✨

بعد الحمام اعتمدت زيت الافوكادو بدل السيروم ” مو اكثر من 5 نقط” على اطراف الشعر قبل م يجف.

✨✨✨✨✨✨✨✨✨✨

تكنيك الزيت :

اكثر طريقه لاحظت انها عطتني نتيجه سريعه هذي الطريقه، للأمانه شفتها في حساب الجميله قليترا.
قبل م تحطي الزيت على شعرك ضروري يكون رطب يعني م تحطي الزيت على شعر جاف ابداً.. انا فضلت ارطب شعري بالتونك بدل المويه عشان تكون الفايده مضاعفه.
ارطب شعري من الجذور للاطراف بالتونك الي عندي ترطيب بسيط مع مساج وبعدها على طول احط الزيت على شعري اكون قسمته على 6 او 8 اقسام عشان الشعر كامل ياخذ حقه من الزيت… اسوي مساج لحد م احس الفروه صارت دافيه بعدها اسوي ضفيره واغطي شعري بالشاور كاب وبعده بالمنشفه الساعه ونص الاولى او الساعتين بحسب برودة الجو.. لما افك الشاور كاب احاول ما اتعرض لتيار هوا عشان ما اصدع… اغسل شعري عادي بعدها ارطب بزيت الافوكادو.

✨✨✨✨✨✨✨✨✨✨

تنظيف فروة الراس:

جربت طريقة منال لتنظيف الفروه وكانت تجربه فضييعه صرت اعتمدها مره في الشهر..
ملعقة بيكربونات الصوديوم، نص ملعقة حنا، شامبو…. وكأنك تغسلي شعرك عادي بس خليها دقايق واشطفيها.

✨✨✨✨✨✨✨✨✨✨

هذا كل الي اعتمدته الفتره الي فاتت تقريباً من فترة الحجر لحد الحين “باختلاف التونك”… النتيجه اكثر من ممتازه..
لاحظت زياده وكثافه في شعري خصوصاً في المقدمه.
النفشه والتقصف اختفت بدون مبالغه
صار شكل شعري صحي وفيه حيويه اكثر حتى التموجات البسيطه شبه اختفت “وهذا اشوفه سلبي”.
شعري مو كيرلي بس فيه تموجات خفيييفه مره.

قبل فتره خالتي قالت لي على طريقة زيت الصبار مره حبيته وقررت ارجع له بين فتره وفتره..

خذي صبار طبيعي نظفي الجزء الحاد منه وخليه في كوب لحد م تنزل العصاره الصفراء وتتأكدي انها نظفت وقطعيها قطع متوسطه، خذي كوب زيت سمسم وحطيه على النار مع الصبار على نار هاديه واستمري في التحريك لحد م تختفي الرغوه، خليه لحد م يبرد وصفيه واستعمليه بنفس طريقتي في زيت سحايب…
خليك قريب من الزيت عشان ما يفور عليك.

النتيجه: اول شي لاحظته النفشه راحت وخف التساقط بشكل ملحوظ… تقريباً الي لاحظته مع زيت سحايب شفته مع زيت الصبار بس زيت الصبار اخذ وقت اطول

✨✨✨✨✨✨✨✨✨✨

حنا المعجزة :

عدلت عليها باللي يناسبني.. اعتمدت بودرات الحنا من رحاب الغامدي وبقية الخطوات خطوات حنا المعجزه
بودرات الحنا على طريقة رحاب الغامدي: نص كيلو حنا، كوب سدر، كوب كركديه، كوب ريحان، كوب سمسم….اطحني الاعشاب كلها وانخليها وحطيها ف علبه لحد وقت الاستخدام….
طريقة الحنا: كوب وربع مويه قطعي فيه بصله بقشورها و3 اكياس شاهي واتركيها تغلي 5 دقايق على نار متوسطه بعدين طفي واتركيه يبرد..بعد م يبرد صفيه واضيفي عليه ملعقتين كاكاو بودره وملعقتين نسكافيه وعصير نص ليمونه وحركيها.. واضيفي 6 ملاعق من بودرات الحنا الي فوق وحركيها بعدين اضيفي ملعقتين زبادي….. تأكدي انها اختلطت معاك بدون اي كلاكيع واتركيها من ساعتين لـ6 ساعات وحطيها ع شعرك “رطبي شعرك بالتونك عشان تستفيدي اكثر”…. انا اتركها على شعري من ساعتين لـ3 ساعات مو اكثر واغسلها ببلسم ومن بكره احط زيت واغسل بشامبو…..
لاحظت شعري صار فيه حيويه وكثافه اكثر ولونه صار احلى… لكن التساقط لاحظت بدأ يخف بعد فتره طويله.

وبكذا انتهت تدوينة عنايتي لشعري واكثر شي استفدت منه..
في انتظار تجاربكم لأفضل منتجات الشعر 🌱🤍.